ليوم حبيت نحكي على سبب من أسباب التدمير الذاتي ... الي هو في حد ذاتو سبب انهيار المجتمع ... على خاطر Tout simplement المجتمع هو مجموعة من الافراد و المجموعات... 

والي يمس الفرد يمس المجموعة ... وهكا يمس المجتمع ككل ..

ليوم باش نحكيو على " ميل الناس للعب دور الضحية" ...

كولين كوكس (الله يرحمو ) يقول: 

"No one can drive me crazy unless I give the keys away"

المعنى العام لقولته انو مفما حتى انسان او حدث ينجم يأثر فيك سلبا مدام انت تنجم تسيطر على روحك و عندك مفاتحك ... 

لكن للاسف نحن كبشر نميلو للحاجة الاسهل و الاسهل عنا نضيعو مفاتحنا و نحملو مسؤولية واقعنا لغيرنا ... 

"معنديش فلوس خاطر الدولة مخدمتنيش" "مرضت على خاطر الطقس خايب" .... و غيرها من العبارات كيما "مكتوب" و "الله غالب" ....

عبارات نقولوها بكل وعي و المشكل الاكبر انو نقولو فيها و نصدقوها و ناسيين انو واقعنا هو "وقوع ما بداخلنا من افكار و قناعات " و نجمو نبدلوه وقت منحبو ... و قت منبدلو الي في داخلنا ... 

من سنوات قريت كتاب اسمو "#CauseEtEffet " للكاتب #تشارلز_هانيل .. كتاب عمره أكثر من 100عام .. كتاب لخص فيه هانيل الواقع عموما كي وصفو على انو مجموعة نتائج لاسباب موجودة ... و اكد انو نحنا الي نصنعو واقعنا بكل تفاصيلو... و أي مشكل نطيحو فيه، المسؤول الاول عالاقل بنسبة 90% باش منصدمكمش و نقول 100% هو نحنا... 

فما معادلة سهلة و بسيطة تقول انو: 

" السبب + ردة افعالنا تجاه السبب = النتيجة " 

و النتيجة في حد ذاتها باش تكون سبب لاحقا... 

اذا خذينا مثال ل "مرضت على خاطر الطقس كان خايب " 

السبب هوني هو الطقس الخايب و النتيجة هو المرض ... 

اذا كانت ردة فعلنا تجاه الطقس البارد مثلا انو استحفظنا على رواحنا و لبسنا لباس يحمينا من البرد و المطر ... تتخيلو وقتها ساهل باش نمرضو ؟! 

المعادلة هذي تنطبق على اي حدث يصير معانا في حياتنا ... 

لذا أول خطوة لتغيير واقعنا للاحسن هو تحمل مسؤوليتو... 

في الدنيا هذي لكلنا نعيشو وفقا لقوانين دقيقة  سنها إلاه الكون "الله" قائمة على مبدأ أساسي الي هو العدل ... 

يعني السبب حتى لوكان ظهر إنو معناش يد فيه هو في حد ذاتو نتيجة لمعادلة سابقة ... 

اذا عندك الخيار بين انك تكون كي الكورة  الي بين ساقين الاشخاص و الاحداث أو انك تشد ال Remote Control متع حياتك ووقت الي متعجبكش قناة تبدل ، شنو تختار ؟ 

يمكن تظهر المسؤولية صعيبة .. 

اما تخيلو حياتكم اذا تبنيتو "تحمل المسؤولية " عوض عن "لعب دور الضحية" كمبدأ حياتي اساسي ! 

أخر حاجة نحب نقولها ... تاكدو انو كل عمل ايجابي نعملوه باش يرجعلنا كنتيجة على شكل سبب ... 

و كل عمل سلبي نعملوه باش يرجعلنا كنتيجة على شكل سبب... 

و لنا الخيار اما ان نختار الخير ام الشر !